თანამედროვე სამშენებლო ინდუსტრია სწრაფად ვითარდება, შესაბამისად, ციფრული ტრანსფორმაცია, განსაკუთრებით პროცესების ავტომატიზაცია და მონაცემებზე დაფუძნებული გადაწყვეტილებების მიღება, ყველა კომპანიისთვის სულ უფრო და უფრო კრიტიკული ხდება. სწორედ ამ გამოწვევაზე საპასუხოდ საქართველოს სამშენებლო ბაზრის ლიდერმა კომპანია „ანაგმა“, „BDO Digital-თან“ თანამშრომლობით დაიწყო ERP-სისტემის (Enterprise Resource Planning) დანერგვა, რომელიც უზრუნველყოფს არაერთ მნიშვნელოვან ოპერაციულ გაუმჯობესებას, მისი დახმარებით ერთ სისტემაში გაერთიანდება ისეთი მნიშვნელოვანი პროცესები, როგორებიც არის: ფულადი სახსრების მართვა, ძირითადი საშუალებები, შესყიდვები, მარაგების მართვა, პროექტების შემოსავლები და ხარჯები, ადამიანური რესურსის მენეჯმენტი და ფეიროლი. მენეჯმენტს შესაძლებლობა ექნება, თითოეული პროცესის ზუსტ და დროულ მონაცემზე ჰქონდეს წვდომა, რაც მნიშვნელოვნად გაამარტივებს გადაწყვეტილების მიღების პროცესს. აღსანიშნავია, რომ ERP-სისტემა შეამცირებს ხელით შესასრულებელ ოპერაციებს, ავტომატიზაციის შედეგად ადამიანური და დროითი რესურსი დაიზოგება, ამავდროულად მნიშვნელოვნად შემცირდება ოპერაციული რისკები ტექნიკური შეცდომების მინიმიზაციით.

პროექტის მიმდინარე ეტაპი და სამომავლო გეგმები

ამ ეტაპზე მიმდინარეობს პროექტის პირველი ფაზა, რომლის ფარგლებშიც ERP-სისტემის საწყობის მოდული უკვე დანერგილია რამდენიმე მსხვილ სამშენებლო ობიექტზე, სადაც საწყობის მართვის პროცესები შესამჩნევად გამარტივდა: მარაგების აღრიცხვა დინამიკური, შესყიდვების პროცესი კი უფრო გამჭვირვალე გახდა.

BDO Digital აქტიურად თანამშრომლობს „ანაგთან“, იმისთვის რომ სისტემა დაინერგოს ყველა განყოფილებაში და მოხდეს ბიზნეს პროცესების სრული ცენტრალიზაცია. ERP-სისტემის ინტეგრაციის დროს ჩატარდა ოპერაციების სიღრმისეული ანალიზი და ოპტიმიზაცია, რამაც „ანაგს“ შესაძლებლობა მისცა აქტიურად აეთვისებინა ხელოვნური ინტელექტის (AI) ტექნოლოგია. აღნიშნული ინოვაციური მიდგომა კომპანიას დაეხმარება, კიდევ უფრო გაამარტივოს ოპერაციების კოორდინაცია და უზრუნველყოს ერთგვაროვან მონაცემთა ანალიზის შესაძლებლობა. BDO Digital და „ანაგი“ ერთად აყალიბებენ სამშენებლო ინდუსტრიის გაციფრულების ახალ სტანდარტს საქართველოში. ERP-სისტემისა და ინოვაციური ტექნოლოგიების ინტეგრაციის დასრულების შემდეგ კომპანია მიიღებს სრულად ცენტრალიზებულ ბიზნესპროცესებს, რომლებიც უზრუნველყოფს მის გამჭვირვალობას ზრდის შესაძლებლობითა და მართვის უპრეცედენტო ინსტრუმენტებით.